Тanlov haqida

“Oʻqituvchilar Assotsiatsiyasi” jamoat birlashmasi xalqaro tajribalar asosida zamonaviy talablarga asoslanib “Ustoz-2020” Milliy mukofotini tashkil etdi.

Ushbu mukofot avvalgi “Yilning eng yaxshi fan oʻqituvchisi” tanlovidan tubdan farq qilib, nominatsiyalar turli fanlarga emas, balki oʻqituvchining umumiy bilim, ko‘nikmalari, fidoyiligi, sohaga qo‘shayotgan yutuqlari kabi jihatlarga asoslangan. Xalq taʼlimi vazirligi tanlovda faqatgina kuzatuvchi sifatida ishtirok etadi. Avvalgi tanlovdan farqli o‘laroq, o‘qituvchilar tuman, viloyat va respublika bosqichlariga jalb etilmaydi. Joriy tanlovda hududga bog‘lanmagan holda istalgan ishtirokchi onlayn ro‘yxatdan oʻtib, tanlovda qatnashish imkoniyatiga ega. Tanlov olti nominatsiya bo‘yicha uch bosqichda boʻlib oʻtadi. Ilk marotaba umumta’lim maktabi oʻquvchilari hamda ota-onalar nominatsiyalar bo‘yicha o‘z ustoz va muallimlarining nomzodi bilan ishtirok etishlari mumkin.

“Ustoz – 2020 milliy mukofotining maqsadlari:

– oʻqituvchi kasbining jamiyatdagi mavqeini yanada oshirish;

– xalq taʼlimi tizimidagi ilgʻor, ijodkor, tashabbuskor ustoz va muallimlarni saralash;

– ularning ijodiy va kasbiy salohiyatlari hamda qobiliyatlarini ochib berish;

–  yosh avlodni tarbiyalash va insoniy fazilatlarini shakllantirishdagi hissasini e’tirof etish;

– taʼlim jarayonida innovatsion texnologiyalardan samarali foydalanadigan va salmoqli natijalarga erishayotgan oʻqituvchilarning ish tajribasini ommalashtirish;

– ilg‘or o‘qituvchilarni xalqaro miqyosdagi tanlovlarda ishtirokini ta’minlash;

– ustoz va muallimlarni qoʻllab-quvvatlash, ta’lim tizimida erishayotgan yutuqlarini rag’batlantirish;

– birinchi marta umumta’lim maktab o’quvchilari va ularning ota-onalari o’z o’qituvchilarining nomzodlarini barcha toifadagi nominatsiyalarda ko’rsatish imkoniyatiga ega bo’ldilar. O’qituvchilar tuman, shahar va viloyatidan qat’i nazar, mukofotda o’z nomzodlarini ko’rsatish imkoniyatiga ega.

“Ustoz – 2020 milliy mukofoti ilk bor Global Teacher Prize tanlovini oʻtkazuvchi Varkey Foundation xalqaro tashkiloti bilan hamkorlikda oʻtkazilmoqda. Ma’lumot uchun, ushbu xorijiy tashkilot hozirga qadar 36 mamlakatda ilg‘or oʻqituvchilarni saralab olish bo‘yicha milliy tanlovlarni oʻtkazishda hamkorlik qilib  keladi.

Ilk bor “Ustoz – 2020 mukofoti gʻoliblari Varkey Foundation tashkilotining Global Teacher Prize – 2021” xalqaro mukofotida qatnashish uchun yo‘llanmani qo‘lga kiritish imkoniyatiga ega b‘ladlar. Ma’lumot uchun Global Teacher Prize – 2021” xalqaro tanlovining gʻolibi 1 million AQSH dollari miqdoridagi pul mukofoti bilan taqdirlanadi.

 

 

«Tanlov o’qituvchining yutuqlarini nafaqat maktabda, balki uning tashqarisida o’quvchilar, hamkasblar, maktab direktorlari va keng jamoatchilik a’zolari tomonidan tan olinishi maqsadiga asoslangan!»

MAQSADI

“Ustoz-2020” Milliy mukofoti – xalq taʼlimi tizimida ishlaydigan innovatsion, ijodkor, tashabbuskor oʻqituvchilarni ragʻbatlantirish, ijodiy salohiyatini ochib berish, ularga oʻzlarini global oʻqituvchilar hamjamiyatining bir qismi sifatida his qilish imkoniyatini berish, shuningdek, taʼlim jarayonida innovatsion texnologiyalardan samarali foydalangan va muhim natijalarga erishgan oʻqituvchilarni ragʻbatlantirish, jamiyatda oʻqituvchi kasbining nufuzini oshirishni MAQSAD qilgan.

BOSQICHLARI VA SANASI

I

bosqich

22-oktyabrdan 13-noyabrgacha
II

bosqich

24-noyabrdan 6-dekabrgacha
III

bosqich

10-dekabrdan 14-dekabrgacha

Tanlovga qatnashish uchun nomzodlar so’rovnomani

2020-yilning 22-oktyabrdan 13 noyabrga qadar www.ustozmukofoti.uz saytida to’ldirishlari zarur.

ISHTIROKCHILAR

Kamida 2 yillik ish tajribasiga ega barcha davlat, nodavlat boshlangich va o’rta ta’lim maktab, ixtisoslashtirilgan, ijod, prezident maktablaroning o’qituvchilari ixtiyoriy ravishda «Ustoz – 2020» milliy mukofotida ishtirok etishlari mumkin.

TANLOV MEZONLARI

Nomzodlar hakamlar hayʼati tomonidan quyidagi mezonlar boʻyicha baholanadi:

Faoliyat samaradorligi va natijaviyligi, oʻquvchilarining ta’limdagi yutuqlari;

Shaxsiy fazilatlar (pedagogik sezgi, ijodkorlik, improvizatsiya, uyushqoqlik va muloqot madaniyati)

Maktabdan tashqari faoliyatida kasbiy va tashkiliy mahorati namunalarini koʻrsatadigan yutuqlarining mavjudligi;

Taʼlim tizimi kelajagiga qoʻshgan hissasi va oʻqituvchilik kasbini targʻib qilishi;

Bo‘sh o‘zlashtiruvchi va iqtidorli oʻquvchilar bilan ish olib borishi;

Oʻqitishda innovatsion taʼlim usullarini qoʻllashi;

NOMINATSIYALAR

TA’LIMDA INNOVATSION YONDASHUV VA GʻOYALARI UCHUN nominatsiya – umumiy oʻrta ta’lim muassasalarining oʻqituvchilari orasidan ta’limga innovatsiyalar tadbiq etgan, koronavirus pandemiyasi sharoitida oʻquv mashgʻulotlari davridagi noan’anaviy yondashuv, darsda qoʻllash uchun tashkil etgan mobil va innovatsion texnologiyalarni amaliyotga keng va samarali tadbiq etgan pedagoglarni ragʻbatlantirish;

MEHRIDARYO USTOZ nominatsiyasi – imkoniyati cheklangan bolalarga uzoq yillar mobaynida mehr koʻrsatib, samarali faoliyat olib borayotgan oʻqituvchilarni ragʻbatlantirish;

TA’LIM SOHASIDA KOʻRSATGAN XIZMATLARI UCHUN nominatsiya – uzoq yillik oʻqituvchilik tajribasiga ega, oʻz kasbiga sadoqatini oʻz mehnati ila namoyon eta olgan, respublikaning chekka hududlari va qishloq maktablarida ishlaydigan oʻqituvchilarni ragʻbatlantirish;

UMID TIMSOLI nominatsiyasi – 7 yillik ish faoliyatidan oshmagan, qator yutuqlarga ega, oʻz kasbiga sadoqatini oʻz mehnati ila namoyon eta olgan yosh va umudli oʻqituvchilarni ragʻbatlantirish;

BOSHLANGʻICH TA’LIM FIDOKOR USTOZI nominatsiyasi – yosh avlodning shakllanishiga beminnat hissa qoʻshgan, barkamol avlodni yetishtirib berish uchun zamin yaratgan eng yaxshi boshlangʻich sinf oʻqituvchilarini ragʻbatlantirish.

PLYUS 1 nominatsiyasi – XTVning tizimiga kirmaydigan barcha maktablarning oʻqituvchilari uchun (xususiy maktablar, ijod, ixtisoslashtirilgan va Prezident maktablari agentligiga qarashli maktablar).

TANLASH JARAYONI

Shaffoflikni taʼminlash uchun barcha mukofot jarayoni auditorlik kompaniyasi tomonidan nazorat qilinadi va tekshiriladi.

Har bir ishtirokchi saytda koʻrsatiladigan vazifalarni bosqichma-bosqich bajarishi kerak:

Videorolik talablari:

– oʻqituvchining ijodkorligi;

– oʻquvchilar bilan vaqt oʻtkazishi (masalan, ixtiyoriy darslarda, qoʻshimcha toʻgaraklarda, iqtidorli va bo‘sh o’zlashtiruvchi oʻquvchilarni qoʻllab-quvvatlash);

– Loyihalar (oʻquvchilar bilan faol fuqarolik pozitsiyasini va umuminsoniy qadriyatlarni shakllantirishga qaratilgan loyiha ishlari);

– innovatsiyalar (oʻqitishning innovatsion usullaridan foydalanish);

– oʻquvchilarning vatanparvarlik tuygʻusi, milliy qadriyatlarga sodiqlik, insonparvarlik gʻoyalarini shakllantirish).

Texnik talablar:

– videoni YouTube tarmogʻiga yuklang, soʻrovnomada havolani qoldiring;

– 2 daqiqadan oshmagan videorolik.

Tarkibiy talablar:

ZOOM INTERVYU – Oʻqituvchining kasbiy mahorati va oʻqitishga yondashuvini baholash uchun savollardan tashkil topgan kasbiy hayotdagi muammoli vaziyatlarga yechim topish qobiliyatini baholaydigan keyslar misolida.

Texnik talablar:

– Internet aloqa.

Final bosqichida boʻlib oʻtadigan turli musobaqalarda qatnashish, shu jumladan 2 daqiqali motivatsion nutq qilish.

SARALASH JARAYONI VA MUDDATLARI

1
Soʻrovnomalarni toʻldirish jarayoni tugagandan soʻng, 14-noyabrdan 23-noyabrga qadar nomzodlar mustaqil hakamlar hay’ati tomonidan koʻrib chiqiladi va 150 nafar ishtirokchi keyingi bosqich uchun saralab olinadi.
2
2020 yil 24-noyabrdan 6-dekabrga qadar mustaqil hakamlar hayʼati nomzodlar bilan Zoom Intervyu oʻtkazishadi va uning natijasi asosida 30 nafar ishtirokchi ikkinchi bosqich uchun saralab olinadi.
3
2020-yil 10-dekabrdan 14-dekabrga qadar 30 nafar nomzod oʻquv-mashgʻulotlar oromgohida (Teacher Camp) turli ijodiy musobaqalarda qatnashishadi va dam olishadi. Ularning faol ishtiroklari va motivatsion chiqishlari natijasida 6 nafar gʻolib aniqlanadi.

TALABLAR

– Bitta ishtirokchi bitta soʻrovnoma toʻldirish huquqiga ega;

– Kechiktirilgan yoki notoʻgʻri yuborilgan arizalar qabul qilinmaydi;

– Tanlovda qatnashish orqali har bir ishtirokchi tanlov tashkilotchilarini har qanday da’vo va majburiyatlardan doimiy ravishda ozod qiladi.

– Ishtirokchilarning mazkur shartlardan birini buzish munosabati bilan uchinchi shaxslardan kelib chiqadigan barcha da’volardan ozod qiladi.

– Ishtirokchilar quyidagilarga ega ekanliklarini bildiradilar: a) o‘zlarining biriktirilgan materiallardagi barcha tarkibga oid hamma intelektual mulk huquqlari; b) ushbu materiallarni taqdim etish vakolatiga ega. Ishtirokchilar ushbu bayonotning buzilishi natijasida to‘g‘ridan-to‘g‘ri yoki bilvosita kelib chiqadigan uchinchi tomonlarning barcha da’volari uchun tanlov tashkilotchilari ozod etiladi.

– Nomzodlar o‘zlarining ismlari va rasmlarini jamoat ehtiyojlari uchun foydalanishga rozilik berishadi, qonun bilan taqiqlangan hollar bundan mustasno. Tanlov ishtirokchisining ismi, ovozi, qiyofasini, uning g‘olibligini va shu bilan bog‘liq barcha masalalarni nashr etish va translyatsiya qilish huquqiga ega ekanligini ishtirokchilar tan olishi kerak.

– Ushbu shartlarning boshqa qoidalariga qaramay, Mukofot jamg‘armasi quyidagilarni o‘z zimmasida qoldiradi: agar g‘olibning so‘rovnomasi yoki har qanday materiallarida yolg‘on ma’lumotlar topilsa, mazkur shartlarni biri buzilsa, tanlov g‘olibga har qanday pul mukofotini to‘lashdan bosh tortish va/yoki to‘langan taqdirda, mukofotni qaytarib berishni talab qilishi mumkin.

– Yuqoridagi shartlar Mukofot jamg‘armasi tomonidan o‘z ixtiyori bilan amaldagi qonunchilikka muvofiq o‘zgartirilishi mumkin.

GʻOLIBLARNI TAQDIRLASH

Mukofotning ikkinchi bosqichidan muvaffaqiyatli oʻtgan barcha ishtirokchilar sertifikat bilan taqdirlanadi. Ular Toshkent viloyatidagi dam olish maskanida oʻquv-mashgʻulot yigʻiniga yo‘llanmani qo‘lga kiritadilar. U yerda ishtirokchilar tajriba almashish, treninglarda ishtirok etish imkoniyatiga ega bo‘ladilar. Shuningdek, saralashning soʻngi bosqichidan oʻtadilar. Shu bilan birga, ishtirokchilarga dam olish uchun ajoyib imkoniyat yaratiladi. So‘ngi bosqich doirasida koʻngilochar tanlovlar, kvestlar, viktorinalar va ekskursiyalar oʻtkazish rejalashtirilgan.

«Ustoz – 2020» mukofot natijalariga koʻra, eng yaxshi 6 nafar gʻolibga 30 million soʻm pul mukofoti, sertifikat va boshqa qimmatbaho sovgʻalar topshiriladi hamda “Global Teacher Prize 2021” tanloviga yo‘llanmani qo‘lga kiritadilar. Qolgan 24 nafar ishtirokchi sertifikat, zamonaviy noutbuk, 5 million soʻm pul mukofoti va boshqa qimmatbaho sovgʻalar bilan taqdirlanadi.

Xalqaro tanlov natijalaridan qatʼi nazar, “Global Teacher Prize 2021” mukofotini taqdirlash marosimida «Ustoz – 2020» milliy mukofotining 6 nafar gʻolibi ishtirok etadi.

MUKOFOT GʻOLIBINING MISSIYASI:

– Xalqaro musobaqalar va tadbirlarda oʻz mamlakatingizni munosib namoyish etish;

– Respublikamiz o‘qituvchilarining yetakchi “ovozi” boʻlish;

– Bolalar huquqlarini himoya qilish va sifatli taʼlimga hissa qoʻshish;

– Hamkasblarni qoʻllab-quvvatlash, oʻz ustida doimiy ishlash;

– Oʻz tajribalari bilan doimiy ravishda almashish;

– Jamoatchilikni qiziqtirgan ta’lim sohasidagi loyihalarda faol ishtirok etish.